Kominike #7
PlanHaiti2k50 pran akt piblikasyon nan jounal monitè bidjè rektifikatif la. PlanHaiti2k50 pwofite atire atansyon administrasyon CPT-Conille lan sou metòd abityèl koupe kou poul ki nan lespri plizyè administratè, direktè jeneral, Minis, kontab piblik…chak fwa peyi a twouve l nan sitiyasyon pou kanpe yon bidjè rektifikatif pandan ane fiskal pra l bout. Se yon metòd louvri baryè koripsyon, brase lajan, fè depans nan vwayaj initil, achte byen ak sèvis, machinn nan lide pou benefisye gwo avantaj.
PlanHaiti2k50 pa rive konprann kijan gouvènman pa pran leson nan koze eskandal 100 milyon goud BNC sa, aloske piblikasyon bidjè rektifikatif la bay direktè jeneral ensititisyon tankou ONA, OAVCT, AAN, FNE, DGI, AGD, BMPAD, SEMANAH, Radyo, Bibliotèk ak teyat nasyonal, biwo nasyonal etnoloji,… zouti finansye pou peye sendika, peye chef pati politik achte manm KPT pou rive konsève pòs yo.
PlanHaiti2k50 ale pi lwen pou mande Minis finans chaponwa pou mete blakawout ak limit nan depans ki gen pou fèt nan enstitisyon kote yo prevwa ranplase Direktè yo, pandan lap egzije piblikasyon rapò depans bouldozè gouvènman Ariel Henry, Saturné ak akolit li yo fè nan bidjè pase a.
Pandan nap kontinye veyatif, PlanHaiti2k50 raple PM Conille pou l pa bliye objektif li se tabli sekirite ak fè bon jan eleksyon men se pa foure men nan kès leta pou enprime kepi ak logo PM, ni kreye espas nan leta pou fè ti zanmi vin n rich sou do pòv malere kap goumen anba lavi chè ak ensekirite tout kalte.
Port-au-Prince, le 27 aout 2024
Rubens Jn Level BAZIL
NB. Cette insertion n’engage que l’organisation PlanHaiti2k50
