Etazini Sispann Finansman Misyon Miltinasyonal la ann Ayiti
1. Yon Desizyon ki Frape Fò
Etazini deside sispann finansman li pou Misyon Miltinasyonal Apwi ak Sekirite a (MMAS) ann Ayiti, yon desizyon ki soulve anpil kè sote. Friz sa a vini nan yon moman kote sitiyasyon sekirite a ap deteryore, ak masak Kenscoff la kote omwen 50 moun pèdi lavi yo.
2. Etazini Revoke Konsiltan, Kanadyen Kite Misyon an
Dapre Miami Herald, Etazini deja revoke kèk konseye ameriken ki t ap travay ak PNH la. Anplis, Madi 4 fevriye, kanadyen ki te konseye polis la te kite Pòtoprens poutèt restriksyon administrasyon Trump mete yo.
3. Yon Kontejan Salvadoryen Rive Ayiti
Pandan Washington ap retire sipò li, yon gwoup 70 sòlda Salvadò te rive ann Ayiti Madi pou vin bay PNH sipò nan konba kont gang yo. Wòl yo gen ladan evakyasyon medikal pandan operasyon sekirite yo.
4. Lapolis Fè Plizyè Arestasyon
Malgre difikilte yo, Polis Nasyonal Ayiti (PNH) kontinye operasyon li yo:
• Peter Philenstor Covens Lundi, alyas Dieupifò, arete nan Cayes-Jakmèl, sou akizasyon li manm gang “Ti Bwa” ki opere nan Kafou, ki te sou lòd “Krisla”.
• Alexandre Frantzs, yon polisye, arete sou akizasyon li gen koneksyon ak gang “Kraze Baryè” ke Vitelhomme Innocent te dirije.
• Kat lòt moun, ki gen ladan yon manm aktif gang “Gran Ravin”, arete nan Depatman Sant la.
5. Premye Depòtasyon Administrasyon Trump Rive Kap Ayisyen
Yon vòl soti Ozetazini ateri OKap Ayisyen Madi 4 fevriye ak yon premye gwoup 24 Ayisyen depòte anba administrasyon Trump la.
Malgre Biwo Nasyonal Migrasyon (ONM) te ba yo 5,000 goud ki égal apreske 38 dolà ameriken kòm asistans finansye. Pa gen sant resepsyon, pa gen okenn pwogram asistans, ni swivi sikolojik pou ede yon reyentegrasyon.
6. Etazini Depòte 109 Dominiken
Nan menm jounen an, Etazini voye tounen 109 sitwayen dominiken ki te antre ilegalman nan peyi a oswa ki te konplete santans prizon yo. Yo te rive nan Ayewopò Las Américas.
Administrasyon Trump lan ogmante depòtasyon imigran, sa ki lakòz tansyon ak plizyè peyi. Otorite dominiken yo ap analize enpak retou sa yo sou popilasyon an, pandan asosyasyon imigran yo denonse politik imigrasyon Trump lan kòm san pitye.
7. Chanjman nan Konsèy Elektoral Pwovizwa (CEP)
Madi 4 fevriye 2025, Patrick Saint-Hilaire, prezidan Konsèy Elektoral Pwovizwa a (CEP), enstale Philippe Augustin kòm nouvo Direktè Egzekitif. Li ranplase Max Délices.
Saint-Hilaire mete aksan sou wòl enpòtan Augustin pral jwe pou reyalize misyon CEP la. Nan diskou li, Augustin deklare ke li pare pou travay “ak onè ak entegrite” pou ede peyi a nan moman difisil sa yo.
8. UEH ak Médecins Sans Frontières Lansè yon Patenarya
Yon nouvo patenarya ant Inivèsite Leta Ayiti (UEH) ak Médecins Sans Frontières (MSF) pèmèt elèv medikal yo fè rezidans yo nan sant ONG sa a.
Joseph Junot, yon rezidan chirijikal katriyèm ane, fè pati premye gwoup ki benefisye de inisyativ sa a. Daprè li, fòmasyon ak sipèvizyon MSF yo pi bon pase sa UEH bay, e sa ede l amelyore konpetans li.
9. Grefye yo Anonse yon Kanpe Travay
Asosyasyon Nasyonal Ayisyen Grefye (ANAGH) anonse yon kanpe travay pou dat 11 pou 14 fevriye 2025 akoz mank de repons sou revandikasyon yo.
10. Trump Retire Etazini nan Konsèy Dwa Moun Nasyonzini
Prezidan Donald Trump siyen yon lòd egzekitif Madi ki retrete Etazini nan Konsèy Dwa Moun Nasyonzini (CDH).
• Washington pa t yon manm aktif, men li te obsèvatè.
• Lòd la entèdi nenpòt patisipasyon ameriken nan CDH nan lavni.
• Li pwolonje sispansyon finansman ajans Nasyonzini pou refijye Palestinyen yo.
Dapre Trump, CDH se yon òganizasyon ki ostil a enterè ameriken yo epi li kontwole pa eta ki pa respekte dwa moun.
Konklizyon
Anpil gwo chanjman fèt sou plan sekirite, diplomatik, ak imigrasyon pandan jounen 4 ak 5 fevriye 2025 la.
• Sispansyon finansman MMAS la vin mete plis presyon sou Ayiti, pandan gang yo ap ogmante atak yo.
• Depòtasyon masiv Ayisyen ak Dominiken yo soulve kesyon sou politik imigrasyon Trump la.
• Grefye yo menase ak yon grèv san limit si gouvènman an pa reponn a demann yo.
• Trump kontinye politik li pou mete Etazini deyò nan òganizasyon entènasyonal yo.
Nap kontinye swiv devlopman sa yo pou nou kenbe nou enfòme sou sa kap pase.
Ronald André
